کرسمس اور بچے

فادرخالد رشید عاصی

آج صبح ٹھیک دس بجے مجھے ہولی روزری گرلز ہائی اسکول، مدینہ ٹاؤن فیصل آباد میں مہمان بننے کا موقع ملا۔ یہ کوئی رسمی دورہ نہ تھا بلکہ خوشی، معصومیت اور باہمی احترام سے بھرا ایک ایسا تجربہ تھا جو دیر تک دل میں اترتا چلا گیا۔

ہر کلاس کے بچوں نے اپنے اپنے گھروں سے ایک ایک ڈِش تیار کر کے لائی تھی۔ یہ صرف کھانوں کی نمائش نہ تھی بلکہ گھریلو محبت، ماں کے ہاتھوں کا ذائقہ اور بچوں کی محنت کی خوشبو اس میں رچی ہوئی تھی۔ جیسے ہی میں ایک کلاس سے دوسری کلاس میں داخل ہوتا، یوں محسوس ہوتا کہ ہر کمرہ کرسمس کے ماحول کی زندہ گواہی دے رہا ہے۔

کہیں بچے کرسمس کے گیت گا رہے تھے، کہیں ہنسی اور قہقہوں کی آوازیں تھیں، کہیں میزوں پر سجے رنگ برنگے کھانے تھے۔ ہر کلاس ایک چھوٹے سے ریسٹورنٹ کا منظر پیش کر رہی تھی، مگر یہ ریسٹورنٹ محبت، شراکت اور خوش دلی سے چل رہا تھا—نہ کوئی فرق، نہ کوئی دیوار۔

اس خوبصورت منظر کی سب سے دل کو چھو لینے والی بات یہ تھی کہ یہاں کیا مسلم، کیا کرسچن—سب بچے ایک ہی جوش، ایک ہی خوشی اور ایک ہی مسکراہٹ کے ساتھ شریک تھے۔ سسڑز اور ساتذہ کی رہنمائی میں یہ بچے اس حقیقت کو جیتے جاگتے انداز میں پیش کر رہے تھے کہ کرسمس صرف ایک مذہبی تہوار نہیں بلکہ محبت، بانٹنے اور ایک دوسرے کو قبول کرنے کا پیغام ہے۔

کرسمس ہمیں یہی سکھاتا ہے کہ خدا محبت ہے، اور جہاں محبت ہے وہاں بچپن کی معصوم ہنسی، رنگ، روشنی اور امید خود بخود جنم لے لیتی ہے۔ ہولی روزری گرلز ہائی اسکول کی یہ صبح اس بات کی روشن مثال تھی کہ اگر بچوں کو محبت اور احترام کے ساتھ پروان چڑھایا جائے تو وہ نفرت نہیں، ہم آہنگی پیدا کرتے ہیں۔

آج اس اسکول کی ہر کلاس میں کرسمس صرف منایا نہیں جا رہا تھا، بلکہ جیا جا رہا تھا—بچوں کے چہروں پر، ان کے گیتوں میں، ان کے لائے ہوئے کھانوں میں اور ان کے بے ساختہ رویّوں میں۔

یہی بچے کل کے معمار ہیں، اور اگر آج وہ کرسمس کو اس طرح سمجھ اور منا رہے ہیں تو یقین کیا جا سکتا ہے کہ آنے والا کل زیادہ روشن، زیادہ پُرامن اور زیادہ انسانی ہوگا