سیلاب میں ڈوبتی انسانیت: کشتی بانوں کی بلیک میلنگ کی کہانی

انیسہ کنول
سیلاب کے دوران متاثرہ علاقوں میں سب سے بڑا مسئلہ نہ صرف پانی کی تباہ کاری ہوتا ہے بلکہ اس کے ساتھ انسانی رویے بھی متاثرین کے لئے کربناک ثابت ہوتے ہیں جب سیلابی ریلے دیہاتوں اور قصبوں کو گھیر لیتے ہیں تو سب سے پہلی ضرورت محفوظ مقامات تک رسائی ہوتی ہے اس مقصد کے لئے مقامی کشتی بانوں کی خدمات حاصل کی جاتی ہیں کیونکہ وہی واحد ذریعہ ہوتے ہیں جو ڈوبے ہوئے علاقوں میں لوگوں کو اور ان کے مال مویشیوں کو نکال کر محفوظ مقامات پر پہنچا سکتے ہیں لیکن اکثر دیکھا گیا ہے کہ ایسے نازک وقت میں بعض کشتی بان انسانی ہمدردی اور خدمت کے جذبے کو پس پشت ڈال کر مجبوری سے فائدہ اٹھاتے ہیں وہ متاثرہ لوگوں سے ضرورت سے زیادہ کرایہ طلب کرتے ہیں اور اگر پیسے فوری طور پر نہ دیے جائیں تو انہیں سوار کرنے سے انکار کر دیتے ہیں اس صورتحال میں متاثرین خصوصاً غریب طبقے کے پاس کوئی دوسرا راستہ نہیں بچتا اور انہیں اپنی زندگیوں کو بچانے کے لیے ہر شرط ماننی پڑتی ہے
ارشد خان جن کا تعلق ترنڈہ محمد پناہ سے اور سیلاب کے دوران سیلابی علاقوں میں مسلسل رپورٹنگ کرتے ہیں وہ اس 2025 کے سیلاب کی صورتحال اور اس میں ڈوبے سیلاب زدگان کے ساتھ رہتے ہیں وہ بتاتے ہیں کہ اس بلیک میلنگ کا سب سے زیادہ نشانہ وہ لوگ بنتے ہیں جن کے ساتھ خواتین، بچے اور مال مویشی ہوتے ہیں پانی میں پھنسے یہ افراد اپنی مجبوری کی بنا پر کشتی بانوں کے رحم و کرم پر ہوتے ہیں کشتی بان ان سے فی کس 5000 سے 10000 روپے وصول کر کے انہیں محفوظ مقام تک پہنچا رہے ہیں اور جن کے ساتھ مال مویشی ہیں ان سے بھی 50 پرسنٹ ہر ڈیل کر کے لے جا رہے ہیں سیلاب زدگان اپنی جان بچانے کی خاطر قرض لے کر، زیورات بیچ کر یا سامان گروی رکھ کر کرایہ ادا کرنے پر مجبور ہیں بعض اوقات یہ شکایات بھی سامنے آئی ہیں کہ ایسے متاثرین جو کہ کم پیسے دیتے ہیں ان سے پیسے لینے کے باوجود کشتی بان انہیں مکمل راستہ فراہم نہیں کرتے بلکہ آدھے رستے چھوڑ دیتے ہیں جس کی وجہ سے مزید مشکلات جنم لیتی ہیں اس عمل سے نہ صرف انسانی المیہ بڑھتا ہے بلکہ سیلاب کے نتیجے میں پیدا ہونے والی غربت اور مسائل میں مزید اضافہ ہو جاتا ہے
یہ رویہ مقامی انتظامیہ اور ریسکیو اداروں کی کمزوری کی بھی عکاسی کرتا ہے اگر حکومت اور ریسکیو ادارے فوری طور پر اپنی کشتیوں اور امدادی ذرائع کو بروئے کار لائیں تو متاثرین کو نجی کشتی بانوں پر انحصار نہ کرنا پڑے لیکن اکثر وسائل کی کمی اور ناقص حکمت عملی کی وجہ سے متاثرین مجبوراً انہی کشتی بانوں کے پاس جاتے ہیں جو حالات سے ناجائز فائدہ اٹھاتے ہیں۔ اس غیر انسانی عمل کو روکنے کے لیے ضروری ہے کہ حکومت سیلابی علاقوں میں پہلے سے کشتیوں اور ریسکیو ٹیموں کا بندوبست کرے، کرایوں کے حوالے سے سخت پالیسی بنائے اور کسی بھی طرح کی بلیک میلنگ کے خلاف فوری کارروائی کرے
(ایڈووکیٹ ہائی کورٹ عاصم بخاری )کا سیلابی مسائل کے حل کے لیے کہتے ہیں کہ اس ساری صورتحال نے یہ حقیقت آشکار کی ہے کہ قدرتی آفات صرف فطری تباہ کاری نہیں ہوتیں بلکہ انسانی رویے بھی متاثرین کے دکھ درد کو کئی گنا بڑھا دیتے ہیں کشتی بانوں کی یہ بلیک میلنگ ایک ایسا سماجی و اخلاقی بحران ہے جو سیلاب زدگان کی مشکلات کو مزید پیچیدہ بنا دیتا ہے اگر فوری اور مؤثر اقدامات نہ کیے گئے تو ہر آنے والے سیلاب میں یہ مسئلہ زیادہ شدت سے سامنے آئے گا اور انسانی جانوں کے ساتھ ساتھ انسانی قدریں بھی ڈوبتی چلی جائیں گی