گلگت بلتستان اسمبلی کی پانچ سالہ کارکردگی !

شیرین کریم

25 نومبر 2020 سے 24 نومبر 2025 تک کا دور گلگت بلتستان کی سیاسی تاریخ میں نہایت اہم رہا ۔ اس پانچ سالہ عرصے میں خطے میں دو مختلف حکومتیں قائم رہیں۔ ابتدا میں پاکستان تحریک انصاف کی حکومت تھی جس کے وزیر اعلیٰ محمد خالد خورشید خان تھے۔ انہوں نے 30 نومبر 2020 کو عہدہ سنبھالا اور 3 جولائی 2023 تک اپنی ذمہ داریاں ادا کیں۔ ان کے دور میں کئی اہم انتظامی اور قانون سازی کے اقدامات کیے گئے۔ بعد ازاں اسمبلی کے باقی دور میں مخلوط حکومت وجود میں آئی، جس کے وزیر اعلیٰ حاجی گلبر خان رہے، اور ان کے دور میں بھی اسمبلی نے اپنا قانون سازی کا عمل جاری رکھا۔

گزشتہ پانچ برسوں کے دوران گلگت بلتستان اسمبلی نے قانون سازی، عوامی مسائل اور انتظامی اصلاحات کے حوالے سے قابلِ ذکر پیش رفت کی۔ ریکارڈ کے مطابق اس عرصے میں اسمبلی نے مجموعی طور پر 57 قوانین پر کام کیا، جن میں مختلف شعبوں سے متعلق اصلاحات شامل تھیں۔ عوامی مسائل اور علاقائی اہمیت کے معاملات اجاگر کرنے کے لیے 110 قراردادیں پیش اور منظور کی گئیں، جبکہ ارکان نے محکماتی غفلت اور عوامی شکایات کی نشاندہی کے لیے 116 توجہ دلاؤ نوٹس بھی جمع کرائے، جن پر مختلف اجلاسوں میں بحث ہوئی۔

اسمبلی میں قانون سازی کے ساتھ ساتھ پارلیمانی کارروائیوں کا سلسلہ بھی بھرپور انداز میں جاری رہا۔ پانچ سال کے دوران ارکان نے 3 تحریکِ استحقاق پیش کیں، جو ایوان کی کارروائی اور ارکان کے حقوق سے متعلق تھیں۔ اسی طرح مختلف ہنگامی اور اہم عوامی معاملات پر غور کے لیے 15 تحریکِ التواء لائی گئیں، جن پر بحث کے بعد متعلقہ محکموں کو سفارشات بھی بھیجی گئیں۔ اجلاسوں کے دوران مجموعی طور پر 40 غیر نشاندہ سوالات پوچھے گئے، جن میں مختلف محکموں کی کارکردگی اور عوامی مسائل کے بارے میں معلومات حاصل کی گئیں۔

اس پانچ سالہ عرصے میں 2020 سے 2025 تک کے لیے کل پانچ بجٹ (میزانئے) بھی اسمبلی سے منظور کیے گئے، جن میں ترقیاتی منصوبوں، عوامی فلاح، تعلیم، صحت اور بنیادی ڈھانچے کی بہتری کے لیے مالی منصوبہ بندی شامل تھی۔

مجموعی طور پر گزشتہ پانچ سال گلگت بلتستان اسمبلی کے لیے سرگرم، فعال اور قانون سازی کے اعتبار سے اہم ثابت ہوئے۔ سیاسی تبدیلیوں کے باوجود اسمبلی نے عوامی مفاد اور خطے کی ضروریات کو مدنظر رکھتے ہوئے اپنے پارلیمانی کردار کو جاری رکھا