محفوظ اور قانونی ہجرت کے حوالے سے آگاہی سیشن کا انعقاد

رپورٹ: یوسف عدنان

مائیگرنٹ ریسورس سنٹر (MRC) لاہور نے ضلع فیصل آباد میں گھوکوال گاؤں میں محفوظ اور قانونی ہجرت پر ایک آگاہی سیشن کا انعقاد کیا۔ اس سیشن میں ایم آر سی کی جانب سے ماریہ سہیل، کاؤنسلر نے شرکاء کو قانونی اور محفوظ ہجرت کے بارے میں آگاہ کیا۔ اس موقع پر ندا عمر، اسسٹنٹ ڈائریکٹر ایف آئی اے، محمد بلال، انسپیکٹر- پی او ای لاہور (بیورو آف امیگریشن اینڈ اوورسیز ایمپلائمنٹ)، طارق منیر، پرنسپل وکیشنل ٹریننگ انسٹیٹیوٹ، اور اورنگ زیب، پنجاب جاب پلیسمنٹ سنٹر (PJC) نے بھی خصوصی شرکت کی۔ یوسف عدنان، پاسٹر بشارت اور دیگر معززینِ علاقہ سمیت بڑی تعداد میں مقامی افراد بھی شریک ہوئے۔
یہ سیشن بیرون ملک ملازمت، تعلیم یا رہائش کے خواہشمند افراد کو مستند معلومات فراہم کرنے کے لیے منعقد کیا گیا تاکہ وہ غیر قانونی ہجرت کے خطرات سے آگاہ ہو سکیں اور محفوظ و قانونی راستے کا انتخاب کریں۔ماریہ سہیل نے کہا کہ اگر آپ ہجرت کا ارادہ رکھتے ہیں تو ہمیشہ قانونی ذرائع اپنائیں تاکہ کسی بھی قسم کے جانی و مالی نقصان سے بچا جا سکے۔ انہوں نے مزید وضاحت کی کہ زیادہ تر افراد بہتر مستقبل کے لیے ہجرت کا فیصلہ کرتے ہیں، لیکن مستند معلومات کی کمی کی وجہ سے وہ غیر قانونی راستے اختیار کر لیتے ہیں۔انہوں نے کہا کہ بعض افراد یہ سمجھتے ہیں کہ غیر قانونی طریقوں سے کم اخراجات میں اور جلد اپنی منزل تک پہنچا جا سکتا ہے، جبکہ حقیقت میں یہ راستے جان لیوا ثابت ہو سکتے ہیں۔ انہوں نے زور دیا کہ محفوظ ہجرت کے لیے ہمیشہ حکومت سے رجسٹرڈ اور لائسنس یافتہ بھرتی ایجنسیوں یا حکومت کے قائم کردہ اوورسیز ایمپلائمنٹ کارپوریشن سے رابطہ کریں۔ندا عمر اسسٹنٹ ڈائریکٹر ایف آئی اے نے انسانی اسمگلنگ کے انسداد میں ایف آئی اے کے کردار پر روشنی ڈالی۔ انہوں نے کہا کہ ایف آئی اے قانون نافذ کرنے والا ایک اہم ادارہ ہے جو غیر قانونی بھرتی، جعل سازی اور انسانی اسمگلنگ جیسے جرائم کے خلاف سخت کارروائیاں کر رہا ہے۔ انہوں نے عوام کو ہدایت کی کہ مشتبہ بھرتی ایجنسیوں یا فراڈ سے متعلق کسی بھی معلومات پر فوری طور پر ایف آئی اے سے رابطہ کریں تاکہ ایسے عناصر کے خلاف کارروائی کی جا سکے۔محمد بلال، انسپیکٹر – پی او ای لاہور نے بیورو آف امیگریشن اینڈ اوورسیز ایمپلائمنٹ (BEOE) کے کردار کو اجاگر کرتے ہوئے کہا کہ BEOE صرف رجسٹرڈ اور لائسنس یافتہ ایجنٹس کے ذریعے ہی روزگار کے مواقع فراہم کرتا ہے اور کسی غیر قانونی ذریعہ کو تحفظ نہیں دیتا۔طارق منیر، پرنسپل وکیشنل ٹریننگ انسٹیٹیوٹ نے فنی تربیت کی اہمیت پر زور دیتے ہوئے کہاکہ فنی تربیت حاصل کرنا نوجوانوں کے لیے ایک سنہری موقع ہے۔ جدید ہنر سیکھ کر نہ صرف بیرون ملک روزگار کے بہتر مواقع حاصل کیے جا سکتے ہیں بلکہ ملک میں بھی باعزت روزگار کے مواقع بڑھائے جا سکتے ہیں۔شرکاء نے اس سیشن کو نہایت مفید قرار دیا اور کہا کہ انہیں محفوظ ہجرت کے حوالے سے بہت سی نئی اور کارآمد معلومات حاصل ہوئیں۔ انہوں نے ایم آر سی کی کاوشوں کو سراہا اور امید ظاہر کی کہ آئندہ بھی ایسے آگاہی سیشنز منعقد کیے جاتے رہیں گے۔
ایم آر سی پاکستان کے بارے میں

مائیگرنٹ ریسورس سنٹر 2016 میں بیرونِ ملک جانے والے خواہشمند افراد کی رہنمائی کے لیے پشاور، اسلام آباد میں وزارتِ سمندر پار پاکستانی و ترقی و انسانی وسائل اور لاہور میں محکمہ لیبر و انسانی وسائل، حکومتِ پنجاب کی سرپرستی میں قائم کیا گیا۔ ایم آر سی، انٹرنیشنل سینٹر فار مائیگریشن پالیسی ڈویلپمنٹ کا ایک ذیلی ادارہ ہے اور اس کی مالی معاونت یورپی یونین کر رہی ہے۔ ایم آر سی بیرونِ ملک جانے کے خواہشمند افراد کو ہجرت سے متعلق تمام معلومات اور رہنمائی مفت فراہم کرتا ہے تاکہ وہ بیرونِ ملک جانے کے لیے بہتر اور محفوظ فیصلہ کرسکیں۔ ذاتی مشاورت، روانگی سے قبل معلوماتی سیشن، تعلیم و فنی اداروں کے ذریعے آگاہی پروگرام کا انعقاد کرنا اس کی بنیادی خدمات میں شامل ہے۔