پاکستان کی حقیقی منزل نظریۂ پاکستان کی تکمیل ہے-

ڈاکٹر حمیرا طارق

اس یوم آزادی کے موقع پر فلسطین اور کشمیر کے مسلمانوں کی قربانیوں کو یاد رکھیں جو اپنے خون سے نئ داستان رقم کر رہے ہیں۔قدسیہ ناموس ناظمہ اسلام آباد
سیکرٹری جنرل حلقہ خواتین جماعت اسلامی پاکستان ڈاکٹر حمیرا طارق کا یوم آزادی پر خصوصی پیغام
اسلام آباد( پ ر)حلقہ خواتین جماعت اسلامی پاکستان کی سیکرٹری جنرل ڈاکٹر حمیرا طارق اور ناظمہ اسلام آباد قدسیہ ناموس نے یوم آزادی کے موقع پر اپنے مشترکہ بیان میں کہا ہے کہ پاکستان کی حقیقی منزل نظریہ پاکستان کی تکمیل ہے۔ یوم آزادی ہمیں یاد دلاتا ہے کہ وطن عزیز اللہ کا خاص انعام ہے جو لاکھوں جگر گوشوں کی قربانی کے نتیجے میں حاصل ہوا- خواتین اسلام نے اپنے سہاگ اور آنچل لٹا کر آزادی کی قیمت چکائی تھی اس لیے پاکستان محض ایک ملک نہیں بلکہ علامہ اقبال اور قائد اعظم سمیت قائدین اسلام کے خوابوں کی تکمیل ہے-
انہوں نے کہا کہ آزادی کی دوسو سالہ جدوجہد میں جب حصول پاکستان کا نعرہ اور نظریہ شامل ہوا تو پھر عملی تعبیر میں صرف سات سال کا عرصہ لگا .
ڈاکٹر حمیرا طارق نے 78 ویں جشن آزادی کے موقع پر قوم کو مبارکباد دیتے ہوئے کہا کہ پاکستان امت مسلمہ کی امیدوں کا مرکز ہے ۔قائد اعظم نے قیام پاکستان کے بعد بارہا یاد دہانی کروائی تھی کہ پاکستان کو وجود میں لانا اصل مقصود نہیں تھا، نظریے کے مطابق ڈھالنا اصل منزل ہے-
وہ قیام پاکستان کی جدوجہد تھی اور آج تکمیل پاکستان کی جدوجہد ہے جس کے لئے پھر سے قیام پاکستان جیسے ولولے اور قربانیاں درکار ہیں۔
پاکستان کی مضبوطی اور اتحاد کی بنیاد اس کا نظریہ ہے، پاکستان کی بقاء ، سلامتی اور خوشحالی کا ضامن صرف اسلام ہے، ہمیں وہ عہد و پیماں پورے کرنے کے لیے نئے عزم کے ساتھ اٹھنا ہوگا جو قیام پاکستان کے وقت ہم نے اپنے رب سے کیے تھے۔۔ پاکستان کا اسلامی آئین ہی اس کو متحد و محفوظ رکھ سکتا ہے اور ایک نظریاتی قیادت اس کے استحکام کی ضرورت ہے۔
انہوں نے مذید کہا کہ اس موقع پر ہمیں اپنے فلسطینی و کشمیری بہن بھائیوں کو بھی فراموش نہیں کرنا چاہیئے جو لاشوں کے انبار سے نظریہ اسلام کو زندہ رکھنے اور ژندہ کرنے کی جدوجہد میں مصروف ہیں۔کشمیر پاکستان کا نامکمل ایجنڈا ہے ہم مشکل کی اس گھڑی میں فلسطینی اور کشمیری بہن بھائیوں کے شانہ بشانہ کھڑے ہیں ۔
اس موقع پے قدسیہ ناموس نے کہا کہ جماعت اسلامی پاکستان کی نظریاتی سرحدوں کی محافظ ہے ۔ہم نہ صرف پاکستانی عوام بلکہ امت مسلمہ کے مسائل کو حل کرنے کے لئے آواز بلند کر رہے ہیں۔پاکستان ترقی کی راہ پر اس وقت گامزن ہو گا جب ہم قیام پاکستان کے وعدے کو پورا کریں گے یعنی اسلامی نظام کا قیام۔
ڈاکٹر حمیرا طارق نے کہا کہ آئیے تمام سیاسی اختلافات سے بالاتر ہو کر وطن کی ترقی کے لئے متحد ہو جائیں تاکہ علامہ اقبال کے خواب اور قائد اعظم کی انتھک جدوجہد کے حاصل پاکستان کو حقیقی معنوں میں اسلامی پاکستان , خوشحال پاکستان بنایا جا سکے- اور یہ اسی وقت ممکن ہے کہ جب ہماری قومی زندگی کے تمام شعبہ جات کی تشکیل قرآن و سنت کے مطابق ہو جائے اور تمام صوبوں کے عوام کو بلا تفریق فومی ترقی کے سفر کا شریک منزل بنایا جائے