عدم پیروی پر سابق صوبائی وزیر شوکت یوسفزئی کی اپیل خارج، ڈسٹرکٹ کورٹ کا فیصلہ برقرار

رپورٹ : مشعال خان
پشاور ہائیکورٹ نے عوامی نیشنل پارٹی (اے این پی) کے سابق مرکزی صدر اسفندیار ولی خان کی جانب سے دائر کردہ ہرجانہ کیس میں سابق صوبائی وزیر شوکت یوسفزئی کی اپیل عدم پیروی کی بنا پر خارج کر دی ہے۔​بار بار کیس کال کیے جانے کے باوجود درخواست گزار یا ان کے وکیل میں سے کوئی بھی عدالت کے سامنے پیش نہیں ہوا۔​ ہائیکورٹ نے اپنے تحریری فیصلے میں کہا کہ مسلسل عدم پیشی سے ظاہر ہوتا ہے کہ درخواست گزار کی اس کیس میں دلچسپی ختم ہو چکی ہے۔​فیصلے کے مطابق، فریقین کی غیر موجودگی میں عدالت کے پاس اپیل خارج کرنے کے علاوہ کوئی دوسرا قانونی راستہ باقی نہیں تھا۔​عوامی نیشنل پارٹی کے سابق مرکزی صدر اسفندیار ولی خان نے سابق صوبائی وزیر شوکت یوسفزئی کے خلاف ہرجانے کا دعویٰ دائر کیا تھا۔ اس مقدمے کی سماعت کرتے ہوئے ڈسٹرکٹ کورٹ نے فیصلہ اسفندیار ولی خان کے حق میں سناتے ہوئے شوکت یوسفزئی کو ہرجانہ ادا کرنے کا حکم دیا تھا۔​ڈسٹرکٹ کورٹ کے اس فیصلے اور جرمانے کے خلاف سابق صوبائی وزیر شوکت یوسفزئی نے پشاور ہائیکورٹ میں اپیل دائر کی تھی، جسے اب عدالت عالیہ نے عدم پیروی اور عدم دلچسپی کی بنیاد پر خارج کر دیا ہے