ڈرگ کوئین کی گرفتاری اور تعلیمی ماحول پراٹھتے سوالات

سمیر اجمل
خبر یہ ہے کہ کراچی سمیت ملک بھر میں ڈرگ سپلائی کرنے والی انمول عرف پنکی کو لاہور سے گرفتار کر لیا گیا ہے یہ خبر تو اتنی بڑی نہیں تھی مگر جس طرح سے یہ گرفتاری عمل میں لائی گئی ہے اور اس کے بعد مبینہ طور پر اس ڈرگ کوئین کی جانب سے جو انکشافات کئے جارہے ہیں اس نے اس خبر کو بڑا بنا دیاہے نیشنل میڈیا کے پرائم ٹائم سے لیکر اخبارات کے پہلے صفحے تک اسی ڈرگ کوئین کی گرفتاری اور انکشافات کے چرچے ہیں یہ انکشافات اس قدر خوفناک ہیں کہ سندھ حکومت کو دھان پان سی نظر آنے والی اس لڑکی سے تفتیش کے لئے جے آئی ٹی بنا نا پڑی ہے جو اس کیس سے جڑے معاملات بارے انکوائری کرے گی یہ کیس شاید اتنا ہائی لائٹ نہ ہوتا اور جے آئی ٹی بھی نہ بنتی اگر اس کے تانے بانے تعلیمی اداروں میں منشیات سپلائی سے نہ ملتے یہی وہ معاملہ ہے جس نے ہر ذی شعور کو ہلا کر رکھ دیا ہے کہ وہ جگہ جہاں پر لوگ اپنے بچوں کو مستقبل سنوارنے کے لئے بھیجتے ہیں وہاں پر ان کا حال بگاڑنے اور مستقبل تاریک کرنے والوں کی مکمل رسائی ہے اور تعلیمی اداروں کے اندر منشیات سپلائی کا مکمل نیٹ ورک موجود ہے طلباء بغیر روک ٹوک کے کوکین اور دیگر موذی نشے کو حاصل اور استعمال کر رہے ہیں ممکن ہے کہ اس ڈرگ کوئین کی گرفتاری اور انکشافات کے بعدحکام بالا کو تعلیمی اداروں کی حالت زارپر رحم آجائے اور ایسے اقدامات کئے جائیں جس سے مستقبل کے معماروں کا مستقبل تاریک ہونے سے بچ جائے کیونکہ اس وقت تعلیمی اداروں کا جو ماحول ہے وہ کسی سے ڈھکا چھپا نہیں ہے۔ تعلیمی اداروں میں منشیات کی سپلائی کی خبریں پہلے بھی آتی رہتی ہیں مگر ان کو کبھی سیریس نہیں لیا گیا نہ کبھی کوئی جے آئی ٹی بنی اور نہ ہی اس نیٹ ورک کو توڑنے کی کوشش کی گئی جس کے ذریعے تعلیمی اداروں میں منشیات سپلائی کی جاتی ہے اور نہ کبھی ان معاملات کا جائزہ لیا گیا ہے جس سے تعلیمی اداروں کا ماحول آلودہ ہورہا ہے اور اس میں صرف منشیات سپلائی ہی نہیں اور بھی بہت سے معاملات ہیں جن پر حکومت وقت کو توجہ دینے کی ضرورت ہے تعلیمی اداروں کی عمارتوں سے لیکر ان کے اندر ہونے والی ایکٹویٹزتک ہر چیز کی مانیٹرنگ کی ضرورت ہے کیونکہ یہاں وہ ہوتا ہے جس کی تصور بھی نہیں کیا جا سکتا‘ ایسی مخدوش حال عمارتیں موجود ہیں جن کے نیچے بچے موت کے سائے کے نیچے بیٹھنے کے مترادف تعلیم حاصل کر نے پر مجبور ہیں ابھی چند روز پہلے ہی ڈیرہ غازی خان میں ایسے ہی ایک تعلیمی ادارے کی عمارت گرنے سے تین معصوم بچے موت کے منہ میں چلے گئے تھے حالانکہ یہ قانون موجود ہے عمارتوں اور ماحول کے حوالے سے ہر سال فٹنس سرٹیفکیٹ کا حصول لازم ہے مگر اس پر عملدرآمد نادار ہے کبھی کسی نے نہیں پوچھا کہ ہر سال کتنے فٹنس سرٹیفکیٹس جاری کئے جاتے ہیں جو عمارتیں حادثات کی نظر ہو جاتی ہیں ان کو فٹنس سرٹیفکیٹس کون جاری کرتا ہے؟قانو ن تو یہ بھی موجود ہے کہ تعلیمی اداروں کے اندر انرجی ڈرنکس فروخت نہیں کئے جا سکتے مگر بقول ڈرگ کوئین یہاں پر تو منشیات تک فروخت کی جاتی ہیں پھر انرجی ڈرنکس کو کون پوچھنے والا ہے؟ یہ وہ سوالات ہیں جو ڈرگ کوئین کے انکشافات کے بعد اٹھنا شروع ہوگئے ہیں اس لئے حکومت وقت کو ان سوالات پر سنجیدگی سے غور کرنا چاہئے اس سے پہلے کہ معاملات ہاتھ سے نکل جائیں